藝人麥雅緻（Angie）去年10月中為老公張頴康誕下囝囝「小花生」，兩公婆再次榮升為父母之餘，就連囡囡張雅喬「小豆」亦升呢家姐，一家四口幸福美滿！
眨吓眼「小花生」已經100日大喇，呢日麥雅緻就喺Instagram晒相透露：「小花生今日百日喇！Happy 100 days！爸爸返工改咗時間，趕得切可以一家人齊聚慶祝！正式介紹，小花生叫張迅橋 Makson Cheung！」
相中見麥雅緻一家大細都有出鏡，當中仲包括兩隻愛犬添，畫面勁溫馨！另外，麥雅緻又大晒囝囝嘅靚相，見囝囝天然呆咁望住鏡頭，又伸脷賣萌，認真Cute到震！
唔少網友都祝囝囝快高長大，仲有人話小花生同家姐小豆簡直似足餅印呀！
(on.cc東網)
