【復合先兆?】洪永城:你係我心目中嘅最佳女主角

    洪永城同唐詩詠嘅戀情絕對係峰迴路轉,二人分手後都Keep住單身,咁即係代表啲咩?咪就係翻撻嘅可能囉!分開咗大半年,早前佢哋就被指二人秘密復合拍拖,仲高度戒備約會,發現有人跟蹤之後,唐詩詠仲直接揸車走人。

    報道出街之後,唐詩詠接受訪問時就話當時仲有其他嘅朋友喺度,係唔想有太多不必要嘅揣測先至分開去。而嚟緊台慶頒獎禮將至,唐詩詠身為視后熱門之一嘅唐詩詠,有宣萱、黃翠如、李佳芯做對手,相信選情都非常之「告急」。

    就連前男友兼緋聞男友洪永城都出招喇!佢晚上10點喺Ig post咗張喺大台app投票嘅截圖,而佢選擇嘅「最佳女主角」就係唐詩詠,佢仲留言話:「記得曾經問過你,如果你攞最佳女主角,你會講啲咩?你話:『有機會攞先算啦。』今年終於到你。有樣嘢非常之佩服你,喺劇組咁多年,我從來未聽過一個人講你壞話,只聽到詩詠好、詩詠得、詩詠無得頂,淨係呢個原因你都至少攞個最佳人緣獎啦。當然你點會剩係得呢個奬咁簡單,見到你每次開劇之前角色上嘅準備工夫,令自己投入狀態,而在劇拍攝中無論自己生活中在幾多嘅情緒,你都保持在那狀態之中,你係我心目中嘅最佳女主角,咁多年嘅努力,希望今次你得。#最佳女主角唐詩詠」

    呢一句「你係我心目中嘅最佳女主角」真係聽到都冧晒啦!今次咁高調唔通真係復合有望?洪永城回覆傳媒時就話,撐舊愛唔係咪想翻撻,佢話:「哈,唔係啦,只是鼓勵同支持。」

    (蘋果日報)

    SHARE