圈中有好多藝人都喺呢幾日瘋狂開聖誕派對，同一班親朋好友相聚一番！而除咗成日見嘅老友，亦有藝人趁呢個機會同啲舊朋友重聚。
呢日藝人李施嬅就喺社交網站上載咗一系列聖誕聚會嘅相，不過今次唔係同胡說八道會，而係同一班好耐冇見嘅港姐姊妹，包括陳茵媺、曹敏莉、戚黛黛同朱凱婷，一齊摸住酒杯gathering！
李施嬅仲留言話：「太久不見了。終於沒有一個人是懷孕或breast feeding（餵母乳），大家都可以喝一杯」嘩！果然係選美出身，個個都仲係咁靚呀，呢啲咪叫做天生麗質囉！陳茵媺都有喺IG晒片，見佢哋全部人揸住香檳，同大家講聖誕快樂，最後陳茵媺仲講咗叫冇人大肚呀，莫非今日想嚟個不醉無歸？
一班港姐仲帶埋一家大細一齊出席，場面非常熱鬧！而「愛妻號」陳豪亦有陪住老婆，見佢哋一個抱住囡囡Camilla，另一個就拖住仔仔，真係超級溫馨！
(on.cc東網)
