【好似城城咁拖手晒愛】公開新戀情:祝大家聖誕節快樂

    噚晚平安夜浪漫夜,有拖拍嘅藝人都忍唔住喺社交網放閃,就好似楊怡同埋江若琳咁。

    而賭王何鴻燊三房公子何猷啟,今年5月同以色列籍索模Angelika Nikolaeva分手。上月有報道指猷啟識咗國產新歡,兩人喺銅鑼灣睇完戲就漫步返屋企,當時《蘋果》問過猷啟係咪拍拖?佢就否認:「係普通朋友,我o依家冇拍拖。」不過,今日猷啟喺微博貼拖手相,留言:「祝大家聖誕節快樂,Merry Christmas!」仲附加一個心心圖案,疑似公告新戀情,唔知邊個女仔令賭王公子封盤呢!以前郭富城都係喺微博貼同方媛嘅拖手相認愛,o依家就輪到猷啟效法,唔知會唔會變潮流呢!

    《蘋果》今日就聯絡咗猷啟,身在外地嘅佢,對於記者恭喜佢有新戀情,佢就笑笑口講聖誕快樂,直認有拖拍:「唔講太多啦,佢係我女朋友,穩定咪先公開,大家一齊過聖誕慶祝。」問到女友係唔係之前有傳媒影到既內地女子,同拍拖幾耐?猷啟就話:「呢D唔講大多啦,大家聖誕節快樂。」

    而江若琳(Elanne)搵到「生煎包皇子」蕭潤邦(Oscar),兩人公開戀情後度過第一個聖誕,並唔係二人世界慶祝,而係Elanne融入男友家普天同慶,Oscar喺ig貼咗大合照,留言:「今晚聖誕聯歡我細佬好出位!」相片見Elanne挨實未來奶奶晒溫馨,《蘋果》致電問Elanne係咪第一次見家長?佢笑晒話:「唔係呀,其實成日都一齊玩。」

    噚晚佢細佬組織咗一個聖誕party,每人有200蚊quota,一大班人玩交換禮物,我抽到潤膚霜。」問到未來老爺、奶奶對佢嘅印象點呢?Elanne表示:「大家好似朋友咁,好friend。」而Elanne就買咗支24K金箔洗面奶交換禮物,畀Oscar細佬嘅女朋友抽到。

    至於去年結婚嘅楊怡同老公羅仲謙就玩騎膊頭佈置聖誕樹,齊齊着紅襯黑情侶裝,被老婆大人雙腿夾實嘅羅仲謙,仲得戚到豎起手指公,貼心心嘴emoji向老婆示愛:「祝大家聖誕節快樂!@楊怡」

    有網友羨慕留言:「哈哈哈!狗狗都抬頭看着你們呢!」

     

    (蘋果日報)

    SHARE