【出年生多個】唔會打仔﹗孫燕姿一句收服5歲囝囝


    孫燕姿噚晚喺台灣舉行《我很愉快》MV首映會,首映會後燕姿就會趕返新加坡,為囝囝籌備5歲生日會。講到同荷蘭籍老公納迪姆結婚6年,囝囝都快5歲,燕姿就爆佢想明年再生BB,幫囝囝搵番個伴。燕姿話,囝囝曾向佢要求想要多個弟弟或妹妹,「他會覺得我吃不夠,要吃到肚子大才行,他以為自己是從嘴巴吐出來的」。

     

    燕姿話,以前覺得只要生一胎就夠,台灣傳媒問到佢點解會突然改變主意,佢就話:「我覺得我有這個空間」。但係燕姿就話生兩個小朋友,已經係佢嘅極限,仲話如果明年真係懷孕,佢就會全面停工,而歌迷好期待嘅巡迴演唱會就要延至佢產後先再計劃,即係話歌迷想睇到燕姿嘅巡迴演唱會,最快可能要係兩年後嘅事。

    講到下一代,媽媽總有講唔完嘅話題,燕姿都唔例外,佢分享湊仔心得時,就話自己偶然都會向囝囝大吼,但事後自己都會同囝囝解釋:「對不起,媽媽壓力很大,我知道你在鬧我」;雖然佢有時會抑壓唔到自己而向囝囝大吼,但燕姿就話自己絕對唔會打仔,通常佢會用一句收服囝囝,呢句就係:「你要媽媽開始喊嗎?」,就係咁,燕姿個仔就會乖乖聽話喇,各位媽媽,你都不妨試下燕姿嘅方法,睇下湊唔湊效吖!

    (蘋果日報)

    SHARE