黃翠如同蕭正楠拍咗拖多年，屢傳婚訊，但係兩個當事人都話會發生就會發生！噚日曹永廉喺微博度爆響口話蕭正楠與黃翠如結婚之後，講句說話都唔同過人，結果又搞到唔少人都關注呢件事！
噚晚翠如喺尖沙嘴出席《使徒行者2》慶功宴，大家梗係追問佢呢個問題，翠如話：「我知曹永廉又講咗無謂嘅說話，我會去黐住佢把口。我啲屋企人都冇驚訝，因為知道係曹永廉講，所以佢哋唔相信！」
問到佢係咪結咗婚但係又唔想公開？佢話：「完全冇，呢個係幾好嘅計劃，等我問吓柏豪先，不過o依家仲有未時間，如果呢個真係秘密，俾曹永廉踢爆咗，佢就死梗！」
跟住有唔少人即刻恭喜佢，翠如話：「我希望收到你哋嘅祝福，未有計劃係幾時，你哋幫我Chur吓喇！」之後有人話翠如似乎好恨嫁，佢笑笑口話：「你同女仔講啲咁嘅嘢嘅？」傳媒講到蕭正楠話等緊求婚喎？翠如即刻面紅紅話：「係，我諗吓先！」
之前黃翠如俾人批評話戲屎，但係近排唔少人喺社交平台留言話對佢改觀，三哥仲點名話睇好佢拎視后，搞到佢好感動！翠如話：「要一個人改觀係好困難嘅的事，呢個對我嚟講好感動，希望做好自己就足夠喇！我冇諗過獎項，我係一個好冇自信嘅人，希望慢慢去建立！」
其實三哥除咗點名話睇好翠如外，亦睇好袁偉豪拎視帝，袁偉豪話：「唔係啩？三哥真係好，我真係開心，搞到我聽完之後都好感觸！對我嚟講，有份參與已經好好，我係睇好王浩信！」
(蘋果日報)
