林盛斌（Bob）一向都係大忙人，工作排到密密麻麻，真係休息都唔夠呀！
日前Bob終於可以早啲收工返屋企，點知返到屋企就有surprise，原來太太同埋囡囡為上個月（24號）生日嘅佢補祝生日。
Bob就當喺社交網上載咗一張一家六口嘅相片，並表示：「多謝太太喺我成日都唔知幾時返嘅情況下，咁都可以為我製造到呢個補祝生日小小小驚喜。」
有家人為佢慶祝，難怪相中見到Bob笑得咁開心，不過就見到二女林熹兒嘅笑容好似有啲僵硬喎，Bob就話原來係有原因。
「多謝幾個女同個仔捱眼瞓等我一齊吹蠟燭，特別係二家姐勁急屎都肯影埋呢張相先痾，佢嗰個就嚟爆炸又要保持笑容個樣真係好正。」
最後佢仲搞笑話：「 我諗我要俾多少少家用嘞，你睇吓個蛋糕大到……」網友都話個亮點絕對係個蛋糕，仲搞笑話似乎Bob要再落力啲搵錢喇！
(on.cc東網)
