【自爆囝囝睇唔起自己】陳小春 :他從來不怕我

    惠州政協陳小春最近帶4歲嘅Jasper一齊上大陸真人騷《爸爸去哪兒》第五季掘金,唔少大陸網民都覺得陳小春對囝囝超凶,不過某啲細節都睇得出佢對囝囝係幾貼心。

    喺《爸爸》首集,小春都認之前要工作,四年時間好少同囝囝相處,囝囝一直由太太應采兒照顧,佢同Jasper嘅父子嘅關係唔太親密,今日有大陸報道指小春早前接受《調戲大明星》專訪時,直言試過兩父子去食飯,感覺尤如陌生人。

    有一次老婆應采兒約咗朋友食飯,叫老公好好睇住Jasper,搵個地方一齊食飯,小春嘆咗一口氣:「吓!她跟兒子談好,你今天跟爸爸,媽咪出去跟朋友吃飯約會,那時候我不喜歡我兒子給人家看,因為自我感覺不良好,所以找了一家沒甚麼人的餐廳,就兩個人吃,當時大家吃完就沒甚麼話。」

    小春扮囝囝啲表情,當時佢問囝囝好唔好食,囝囝只係「嗯」咗一聲,無奈咁點點頭,小春再問囝囝,同爸爸出嚟食飯開唔開心,囝囝Jasper無言,低頭左望右望,然後繼續食飯,未有回答,小春瞪大眼:「這真的是親生兒子,上次跟他吃飯好像剛認識一樣,好像兩個男女在約會一樣。」

    身為爸爸嘅小春,雖然喺節目中,對住囝囝Jasper,成個嚴父咁,不過小春喺專訪中,搖搖頭,坦言:「他從來不怕我,看不起我,做爸爸厲害沒用啊,他喜歡跟公公,公公是早飯、午餐、晚飯都煮很好吃的東西給他吃,但這次他會有點……不要說怕吧,他起碼(No),他會收。」

    小春笑笑口話今次同囝囝關係有進步,至少識點應付小朋友,完全自己照顧囝囝,學識湊囝經,知道點o氹囝囝瞓覺,當囝囝覺得喉嚨痕,又或者話「我不困」,其實就好想瞓,只要爸爸講睡前故事,或者扮瞓着,囝囝就好易恰着,o依家囝囝多咗黐佢,令小春覺得很幸福,父子好似「好兄弟」。

    (蘋果日報)

    SHARE