【幸福媽媽】42歲麥家琪再現幕前教仔女:堅持

      

    參選港姐晉身娛樂圈嘅麥家琪,06年下嫁大律師王國豪,之後淡出幕前,做少奶奶之餘更密密生。麥家琪婚後連生兩子,大仔 Johan,細仔Enoch,而有仔自然想追女,佢12年再如願順利誕下細女。

    麥家琪昨日出席ViuTV「G-1格鬥會II」記者會,已經生咗兩子一女嘅佢,出場時話好耐冇見大家,今次參加MMA比賽係想話畀仔女知咩叫堅持。受訪時,被問到點備戰?家琪就話最近好忙,要為電影宣傳,覺得好累,未有時間練拳。問到有冇信心勝出比賽?佢直言冇,會當平時做運動咁。佢又笑住話會真打對手:「打佢囉,梗係要真打,其實我本身唔驚,但愈睇外國比賽就愈驚,打到噴血,頂唔順。(驚唔驚小朋友睇到會擔心你?)有教小朋友咩係運動,咩係爛仔交,我有畀佢哋學泰拳,保護自己,但唔可以蝦蝦霸霸。」

    不過家琪話現場比賽就一定唔畀小朋友嚟睇,費事佢哋騷擾到其他參賽者,而小朋友亦唔知佢參加今次比賽。問佢怕唔怕體力唔夠?佢話:「唔擔心,呢啲係練番嚟,最多休息多啲。(少咗時間陪仔女?)唔會,以佢哋為先。不過真係好忙,又湊小朋友,又練拳。」

    (東方日報)

    SHARE