【辛苦哂各位媽媽…】麥家琪一個湊三個﹕一分鐘叫60次媽咪

    麥家琪、陳琪、李霖恩等今晚喺會展出席兒童音樂舞活動,麥家琪有兩子一女,年紀最細、今年5歲嘅囡囡以晴雖然好有表演慾,但就因為怕羞,所以唔敢上台表演,佢話﹕「平時阿女負責教我跳Jazz同Hip Hot,喺屋企就好生猛,但上到台就搣裙,好緊張,明顯唔夠自信心。(咁使唔使訓練吓?)唔使,會慢慢培養嚟。」佢仲笑細仔係賭神,每次影相都會好快擰轉面。

    家琪話呢個暑期有開心有唔開心,因為平時三個小朋友一齊,佢就會覺得好煩,佢話﹕「佢哋一分鐘叫60次媽咪,我叫佢哋唔好再媽我喇,帶佢哋睇醫生,醫生都話我講嘢冇氣,仲搞牙醫啲嘢。但我知佢哋唔係曳,只係求知欲強。」家琪話o依家會中港兩邊走,直言小朋友返學後會接多啲幕前工作,唔想只係做家庭主婦。

    而陳琪早前就帶小朋友去澳洲15日旅行,到當地體驗生活,佢話﹕「帶佢哋去農場睇羊牛,仲有上雪山滑雪,都似模似樣。爸爸(胡諾言)都有去,但好快就要先返香港,因為要趕拍劇,冇辨法,o依家一四口得佢一個搵錢,我就要幫佢加油!」

    (蘋果日報)

    SHARE