莫可欣今日喺旺角接受黎燕珊主持嘅奇妙電視中文台節目《朝拜傲媽》訪問，節目中兩人大談仔女經，而珊姐話同可欣老公方中信相識多年，曾經一齊到英國拍電影，珊姐話：「當年方中信好鍾意整蠱我，試過同方平喺半夜㩒我門鐘，然後用冰桶淋我。」身為太太嘅莫可欣話初認識老公時，老公已經變Cool，更從來都冇同佢講過笑話，相反囡囡就遺傳咗爸爸嘅幽默感，不時上網搜尋整蠱人嘅片段，最近更搵咗一條用豉油扮可樂嘅片，未知係咪想整蠱同學。
日前可欣就有份出席劇集《鑑證實錄》廿周年聚會，跟林保怡、陳慧珊同李珊珊等一眾舊拍檔聚舊，可欣話：「最開心係見到李珊珊，因為之前啲報道咁，嗰晚見佢精神幾好。」
當年拍劇時跟陳慧珊對手戲較多，同李珊珊冇乜戲份，所以兩人唔係好熟，甚少溝通，但廿年後大家都成熟咗，兼互相欣賞，故特別珍惜呢份友誼。可欣又話當年拍劇，只維持咗五年，因為演技唔係太好，佢笑話若果要佢做扮驚反應，可能拍50個Take都未能收貨，所以最終佢決定做好媽媽嘅角色。
(蘋果日報)
