武漢肺炎肆虐全球，森美父母是疫輪「鑽石公主號」乘客，早前返港才接受完隔離令，怎知森美在英國讀書的17歲兒子梁曦樂，預計下星期返港避疫，到時亦要在屋企接受14日家居隔離，一家有三人先後要接受隔離，森美接受訪問時嘆說：「人生係咁啦，希望最後冇事！」
英國目前有逾1300宗確診，累計35人死亡，不少香港父母有送子女到英國留學，有家長批評英國政府「佛系抗疫」令疫情爆發，急撲機票返港，商務位貴至7千鎊，而返港後要接受14日家居隔離。
森美的17歲兒子梁曦樂在英國讀書，對於英國的「佛系抗疫」，森美說：「可以用乜嘢方法抗疫我唔識，不過都麻煩，本來復活節返嚟，但學校上個禮拜都話你哋返就返啦，但我個仔就覺得，今年要考公開試，佢想讀好啲書、上好啲堂，不如遲兩個星期先，因為上個禮拜情況都未嚴重，佢住嘅地方偏遠。」
由於兒子已經17歲，森美尊重對方決定：「我諗佢都咁大個，畀佢自己決定，不過我話唔好兩個禮拜，一個禮拜後返啦，所以下星期返，雖然疫情嚴重咗，但都冇辦法，機票都爆晒，但我買咗機票啦，如果需要隔離，咪喺屋企隔離囉，唔好出街，保障自己又保障人。」
森美指疫情嚴峻後，由於自己工作要外出，家人都甚少出街：「佢返嚟留喺屋企溫書應付考試，佢都ok嘅，喺英國都係留喺宿舍溫書，所以唔特別太緊張搵機票。」問到跟父母見面了嗎？他說：「未見呀，我未隔離到自己，等我隔離到自己先見佢哋。」
(綜合報導/蘋果娛樂)
