【46歲宣萱】半生經歷5段情

    宣萱喺《撒嬌》一劇中,飾演聞風喪膽嘅高壓上司,半夜叫班下屬開OT已屬皮毛,但開會期間,去廁所飲水聽電話通通唔准,為咗贏男人,索性連子宮都切埋,就有啲啲過火。好彩最終得舊情人林文龍打救,終於變番個正常女人。

    現實中,今年46歲嘅宣萱,雖然未至於如劇中Moll姐係操控狂,但性格硬朗獨立嘅佢,半生經歷5段感情,可惜段段撻Q,至今依然孓然一身。

    09年 外籍獸醫:本身鍾意小動物嘅宣萱,同細自己4年嘅外籍獸醫Ruan Bester,拍拖兩年,傳媒不時影到女方到男友診所幫手,宣萱更講明視對方係結婚對象,又長途跋涉去南非見家長。但最終宣布因「價值觀唔同,步伐唔一致」為由而同外籍男分手。

    03年 富貴牙醫:當年已屬大台花旦之一嘅宣萱,同有家底嘅牙齒矯正科醫生陳建緯熱戀,二人發展迅速,當時宣萱公開恨嫁宣言:「女人最終都要有個伴,現階段我可以為愛情犧牲事業。」講得出做得到嘅宣萱,當年為箍實男友狂推劇,可惜二人最終於兩年後分手。

    02年 戲假情真:盛傳拍劇集《流金歲月》時撻着人夫羅嘉良(撈家),其實二人喺96年合作拍《天地男兒》做情侶已經傳出緋聞,但二人否認話只有兄妹情。02年由於緋聞傳得太熱烘烘,更有指宣萱介入導致撈家婚變,最後撈家得太太出面力撐,事件先告一段落。

    96年 最長感情:經朋友介紹,認識中信泰富主席榮智健嘅堂姪榮文瀚,二人拍拖6年,不時雙雙出席公開場合,更試過傳出婚訊,但因聚少離多,二人越走越遠,最終分手收場。

    93年 戀上健仔:當年啱啱入行嘅宣萱,因拍劇集《龍兄鼠弟》戀上同劇拍檔張衞健,宣萱不時夜訪男友家中,更講明甘願做健仔背後女人,可惜戀情只維持兩年就告終。近日二人先後返大台拍劇,宣萱就話唔介意同對方合作。

     

    (蘋果日報)

     

    SHARE