【唔會擺酒】準人夫張致恒認以前貪玩 現在要為家庭努力

    藝人張致恒(Steven)日前突然宣布與粉絲雯雯結婚兼已做爸爸後,即爆出「一腳踏五船」,被封世紀賤男,他與關智斌的演唱會被喝停,變由關智斌(Kenny)與英皇群星演出。潛水多日的Steven今日蒲頭,首度親身開腔回應再致歉。


    這陣子有不少傳媒在Steven住所樓下等候,今日約12時許,終於看到他手抱愛犬與未婚妻雯雯齊齊離開住所,見到記者他表現友善,將愛犬交給雯雯,接受傳媒訪問。他透露狗狗因與家中另一愛犬打交受傷,現帶牠睇醫生,續表示要回應的已在網上回應了。被問到心情時,他説:「依家都需要沉澱吓,希望未來做的更好。(BOYZ演唱會變咗得番Kenny?)我有睇到,咁都好,我可以放下心頭大石。」


    提到是否沒有想到公布結婚後,引起如此多事端?Steven說:「結婚係人都會,我都係盡自己嘅責任,以前貪玩,依家有咗BB,要醒要向前看,係時候為咗家庭要努力。」問到依家經濟有冇問題?他即無奈苦笑:「唔講咁多啦!」又指與公司一直有聯絡,遲點會離開香港拍戲,而事件對工作亦有一定的影響。

    問到婚禮是否會低調進行以及幾時舉行?Steven說:「應該下個月,但暫時唔會擺酒。」之後Steven又再次致歉:「唔好意思,依家香港咁亂,我自己又搞到大家咁亂,其實我唔應該再講咁多嘢,真係唔好意思搞到大家。」之後上車會合雯雯,齊到太子的一間獸醫診所,到達後雯雯留到車中,Steven獨自帶愛犬睇醫生。約1時許,Steven離開診所並透露狗狗耳仔發炎,買了兩袋狗糧後便回家。

     

     

     

     

    (綜合報道 / on.cc)

    SHARE