古巨基《We我們》世界巡迴演唱會Part2香港站，昨晚在紅館繼續演出，楊受成夫婦、關智斌、麥亨利、衛詩雅與母親、王賢誌等人捧場，他的父母坐足一晚支持。
上次表演時意外掉落機關的古巨基，一如之前兩場一樣取笑自己，帶領全場觀眾大叫「睇路呀靚仔」，全晚順利完成。
當晚表演嘉賓找來老友方力申、小肥和Rubber Band主音6號等人，眾人與古巨基合唱。身穿黑白色禮服的五子甫上台便獲全場歡呼聲歡迎，與基仔合唱《年年有今日》時，眾人High爆走到台邊的延伸台同Fans握手。唱畢小方大爆側田剛才於後台差啲喊，側田解釋：「啱啱喺後台幫你唱咗兩首歌嘅和音，記得你畀我嘅第一個工作就係唱和音，諗番起啲回憶都眼濕濕！」
已12年沒同台演出的方力申自言回憶返來了，古巨基說：「我哋之前喺電視節目重組，但欠6號，07年我演唱會有搵佢哋做我嘉賓。」
基仔續指去到12年後的今年終於可聚首一堂。每場於此環節基仔都「例行」找回舊相重影，他邊睇邊笑話：「呢張係2007年演唱會上嘅一張相，點解小肥都可以畀人擋住咗？搵多張見齊人嘅！」笑爆全場，然後大螢幕換了一張MV照，眾人齊齊「歸位」擺Pose影相，基仔打趣話希望廿年後合體再影老年版。
說到此時基仔就不禁哽咽起來，更即場淚灑現場，教人心痛！
完騷接受訪問，古巨基自言眼淺，之前多晚提到家人也沒有哭：「突然諗番起爸爸喺電話筒中把聲，佢只係聽吓我把聲就安心瞓，我一時感觸。」
今次Part 2演出，有部份新服裝質料很重：「第1套水晶衫用咗2萬粒水晶重80磅，好似孭住一個年輕人唱歌，我哋試過好多種石，為咗靚所以重啲。」
他笑指每晚完騷如打完一場仗，令他腰部舊患隱隱作痛：「以防萬一，噚晚搵個醫師幫我順返啲肌腱。」另外，之前李克勤做表演嘉賓教他生仔秘笈：「佢叫我腳趾拉西，邊個西先？左邊定右邊？校長（譚詠麟）教倒掛金鈎，開騷冇得倒掛，同埋邊個倒、邊個掛？佢叫我意會。」
(綜合報道)
