【講到BB性別…】岑麗香挺巨肚:依家仲未Book床位

    懷孕6個多月的索爆準媽媽岑麗香(香香),昨日挺肚出席有份參演的賀歲歌舞電影首映禮,香香冇有怕繼續着3吋「斗零踭」,認真貪靚!

    講到今次的賀歲片,香香預告會有性感演出:「角色幾得意,所以都豁出去,老公知道都接受。」又自爆初期開工原來已有B,直到拍至尾段才發現:「覺得個人上鏡有少少肥,試過攝影師叫我縮肚,我答佢會盡力,其實心諗都收唔到咁多,嗰時又未夠3個月唔講得。」

    香香再爆戲中有幕需要奶茶淋身:「拍完返屋企攰得濟攤喺梳化成個鐘,之後開始聞到頭髮一陣牛奶騷味就即刻去沖涼。」

    日前香香被傳媒影到佗B出巡掃年貨,她表示要送禮物給朋友,問再是否要幫BB𢭃利是?

    香香笑指:「未得住,BB等得嘅,今年都係派利是先。」續指仍未決定是否在加拿大待產,但於香港生B機會甚大:「依家仲未Book床位,都有啲壓力,希望可以順產,做過Research如果BB順產會健康啲。」

    不過香香說順產還有另一原因…

    「我怕開刀同埋血,可以順產嘅,唔係太可怕。(老公強強會陪入產房剪臍帶?)感該會,呢排都唔畀佢飛咁多。(老公怕血?)佢冇我咁怕,我去抽血會瞇埋眼又會拖住佢隻手,仲會好大力!所以到時我都戥佢辛苦,陪我一齊痛,但佢係手痛!」

    問到BB性別時,香香繼續封口保持神祕,至於問到幾時全面停工待產?她表示暫時未確定,不過間中出活動都好開心。

     

     

     

     

     

     

    (綜合報道 / on.cc)

    SHARE