杜汶澤同田蕊妮拍拖6年，二人喺2005年拉埋天窗。
田蕊妮十六嵗就認識杜汶澤
兩人結婚近14年，多年嚟遇過感情危機、阿澤曾患罕見疾病「米勒費雪症候群（Miller Fisher Syndrome）」，必須停工，田蕊妮當時喺寧波拍戲，自責未能喺阿澤身邊陪伴，阿澤仲安慰番佢轉頭，令田蕊妮佩服阿澤遇到逆境，仍能安然面對，讚阿澤係佢「心目中的巨人」。
但杜汶澤同田蕊妮呢對夫妻今次真係名副其實嘅同病相憐！
近日流感肆虐，連藝人田蕊妮都唔小心中咗招！
佢今日上載咗一堆藥嘅相，留言：「中咗流感！是日停工一天！」
唔少網友都叫佢多啲休息多幾日，等身體快啲好番先再搏殺，但竟然有網友留言話：「同杜生（杜汶澤）有福同享」，雖然話「小病是福」，但流感都可大可小喎，點解網友咁講先？
原來呢個「福」係特敏福個福！事關杜汶澤同老婆一樣都分享咗堆藥嘅相，當中仲有特敏福，佢留言：「我老婆佢好好，有咩都會同我分享，唔會收埋收埋…….包括病。#覺感恩」
原來兩公婆都中咗流感，認真慘！但見杜汶澤仲識得苦中作樂，應該就冇乜大礙嘅！希望杜生杜太好好休息，早日康復呀！
(綜合報道 / on.cc)
